Skip to main content Skip to search
རྙེ་ལྷུན་གྲུབ་ཆོས་རྫོང་ངོ་སྤྲོད་མདོར་བསྡུས།

  དགོན་པ་འདི་ནོར་འཛིན་ས་ཡི་ཐིག་ལེ་ཁྲི་ཀ་གསེར་མོ་ལྗོངས་ཞེས་པའི་ས་ཆར་འཕྲང་དམར་ཚོ་སྐོར་བཅུ་གཉིས་ཀྱི་ནང་ཚན་སྟག་ རིག་སྡེ་བའི་ཉེ་འདབས་ཀྱི་དཔལ་འཁོར་ལོ་སྡོམ་པའི་ཞིང་བཀོད་ནོར་བུ་གསུམ་སྤུངས་འདྲ་བའི་རི་ཆུང་གསུམ་གྱི་ལྟེ་བ་རུ་ཆགས་ ཡོད་ལ་རྫོང་མཁར་ནས་སྤྱི་ལེ་སུམ་བཅུ་ཡས་མས་ཡོད། དགོན་པ་དེ་ཁྲི་ཀའི་དགོན་མ་ལག་ཉེར་ལྔའི་ཡ་གྱལ་དགེ་ལུགས་པའི་རི་ཁྲོད་དགོན་པ་ཞིག་ཡིན་ལ། དངོས་མིང་ནི་རྙེ་རི་ཁྲོད་ལྷུན་གྲུབ་ཆོས་རྫོང་ཟེར།

  དགོན་པ་འདི་ཕྱག་འདེབས་གནང་མཁན་ནི།

ལྷར་བཅས་སྐྱེ་དགུའི་གཙུག་ནི་ནོར་བུ་སྟེ་རྗེ་བཙུན་༧བློ་བཟང་ནམ་མཁའ་རྒྱལ་མཚན་མཆོག་ཉིད་ཡིན་ལ། རབ་བྱུང་བཅུ་གཅིག་པའི་ལྕགས་ཕོ་བྱི་ལོའི་སྤྱི་ལོ་༡༦༦༠ལོ་དང་། རབ་བྱུང་བཅུ་གསུམ་པའི་མེ་ཕག་སྟེ་སྤྱི་ལོ་༡༧༦༧ལོ། རབ་བྱུང་བཅུ་གསུམ་པའི་ལྕགས་སྟག་སྟེ་སྤྱི་ལོ་༡༧༧༠ལོ་སོགས་བཏབ་གནང་མཛད་དུས་མི་མཐུན་པ་གང་མང་ཡོད་མོད། ཕྲན་གྱིས་ལོ་རྒྱུས་དང་ངག་རྒྱུན་ལ་དཔྱད་བསྡུར་བྱས་མཐར། སྤྱི་ལོ་༡༧༡༠ལོར་ཀུན་མཁྱེན་འཇམ་དབྱངས་བཞད་པས་བླ་བྲང་བཀྲ་ཤིས་འཁྱིལ་བཏབ་པ་དང་དུས་མཚུངས་ལ་གཙིགས་ཆེ་བས་ དུས་དེར་ངོས་འཛིན་བཞིན་ཡོད། དགོན་པ་འདིའི་གསེར་ཏོག་སེར་པོའི་གཟི་འོད་དང་གཡུ་གྱོ་སྔོན་མོའི་རྒྱ་ཕིབས་འོག་ནས་འཔལ་འབར་བའི་བསྟན་པའི་མངའ་བདག་འགའ་བརྗོད་ན། སྒོམ་སྡེ་མན་མཁའ་རྒྱལ་མཚན་མཆོག་གིས་སྐུ་ཚེ་གང་བོར་རྣམ་དཀར་དགེ་བའི་ལས་ཁོ་ནར་ཐུགས་གཞོལ་པས་ བསྟན་པའི་མངའ་བདག་ཏུ་གྱུར། ངག་དབང་བསྟན་འཛིན་མཆོག་གིས་སྦྱངས་བརྩོན་ལྷོད་མེད་བྱས་པས། སྐྱེ་སྦྱངས་ཀྱི་ཤེས་རབ་ལ་ཐོགས་པ་མེད་པའི་རྣམ་དཔྱོད་ཀྱི་ཀློང་བརྡོལ་ཞིང་སྡེ་སྣོད་གསུམ་དང་རྒྱུད་སྡེ་བཞི་སོགས་ཟབ་མོའི་དོན་ མཐའ་དག་ཐུགས་སུ་ཆུད་པ། གོང་ས་༧རྒྱལ་དབང་མཆོག་གིས་ཐམས་ཅད་མཁྱེན་པའི་མཚན་གསོལ་ཚུལ་སོགས་བསིལ་ལྡན་འཛིན་མའི་ཁྱོན་ན་འབར་བས་ འདིར་རྒྱས་བཤད་བྱ་དགོས་དོན་མེད།

བསྟན་པའི་རྒྱལ་མཚན་མཆོག་གིས་རིག་པའི་སྒོ་འབྱེད་བསྡུས་གྲྭ་ནས་དབུ་ཕར་སོགས་གཞུང་པོད་ཚང་མའི་མཐའ་དཔྱོད་ལ་སློབ་ གཉེར་གནང་མཐར་བདུད་རྩིས་ཐུགས་ཀྱི་བུམ་བཟང་གང་བར་བྱས་ཤིང་། སྐྱེས་ཆེན་དམ་པ་མང་པོས་བསྔགས་བརྗོད་ཀྱི་སྦྲང་ཆར་ བསྙིལ་བ་སོགས་ལོ་རྒྱུས་སུ་གསལ། ད་དུང་བསྟན་འཛིན་བྱེ་བའི་གཙུག་རྒྱན་གང་མང་བྱོན་མྱོང་ལ། ད་ལྟའང་གསང་ཆེན་གྲུབ་པའི་རྣལ་འབྱོར་བ་དགེ་སློང་ཆོས་གྲགས་རྒྱ་མཚོ་ཞེས་པའི་སྔགས་ནུས་ལ་ཀློང་བརྡོལ་བའི་དད་ལྡན་འགྲོ་ བའི་མགོན་པོ་ཞིག་དངོས་སུ་བཞུགས་ཡོད་ལ། ཁོང་གི་བྱིན་རླབས་ཕྲན་བུ“གསོ་ཐབས་རྡོ་རྗེ་ལྷུན་པོ ”རུ་གསལ། འདི་འདྲའི་སྐྱེས་ཆེན་དག་གི་གདན་ས་བླ་ན་མེད་པ་འདིའི་ལྷ་རྟེན་འགངས་ཆེན་དང་གནས་ཀྱི་བྱིན་རླབས་སོགས་རགས་བཤད་བྲིས་ཀྱང་མང་འགྲོ་བས་མ་བྲིས་སོ།།

Places Amdo Nye Drupdé Lhündrup Chödzong
རྙེ་ལྷུན་གྲུབ་ཆོས་རྫོང་ངོ་སྤྲོད་མདོར་བསྡུས།
Collection Modern Writing from Qinghai Province
Visibility Public - accessible to all site users (default)
Author Trisé Penden and the Red Garland Editorial Board
Year published 2018
Subjects
Places
Terms
Rights All copyrights held by the original author(s). Published by the University of Virginia Tibetan and Himalayan Library
Creative Commons Licence